“Alquimia”, o 4 de decembro no Multiusos de Monforte

Dentro do Ciclo da Rede de Teatros e Auditorios da Xunta, este domingo, 4 de decembro ás 18:00 no Edificio Multiusos terá lugar a posta en escena do espectáculo para público infantil e familiar titulado Alquimia, do Mago Teto.

Mago Teto

O teatro volverá ser protagonista da actividade cultural deseñada polo Concello de Monforte no segundo semestre do ano 2022, cunha nova peza teatral, a última deste ciclo, que ademais está incluída no programa de actividades de Nadal do Concello de Monforte.

Nesta nova aventura, o mago Teto, tras varios anos estudando, experimentando e intentando descifrar a estraña simboloxía dos libros sobre alquimia, ponse na pel dos alquimistas perseguindo o seu soño e buscando a pedra filosofal; non para conseguir a riqueza e a vida eterna, senón a alquimia que está dirixida ao corazón, ¡¡a felicidade!!.

Durante milleiros de anos, os alquimistas, nómades con grandes coñecementos nas matemáticas, na física, na química, na astroloxía e incluso no ocultismo, viaxaron cos seus laboratorios ambulantes por todos os lugares do mundo cun obxectivo concreto. Ese obxectivo era atopar a Pedra Filosofal.

O soño dos alquimistas era dominar a natureza, o lume, e finalmente o tempo. Os alquimistas crían que a pedra filosofal podería concederlles tanto a cura de todas as enfermidades para gozar da vida eterna como a riqueza, transformando metais en ouro. Cando conseguían estes logros, coñecíase como “A gran Obra”.

DEIXAR UN COMENTARIO

Please enter your comment!
Please enter your name here