O libro de viaxes Galicia, mostra da faceta como narrador do intelectual laurentino, e Francisco Fernández del Riego. O legado silandeiro, son os dous libros cos que a Vicepresidencia da Deputación agasallará ao alumnado dos Colexios e Institutos da provincia de Lugo para conmemorar o Día das Letras Galegas deste ano. O legado silandeiro, de Héctor Cajaraville, é un libro para lectores e lectoras novas –publicado na Colección Merlín de Xerais– que aborda a contribución de Del Riego á vida política, social e cultural e inclúe unha presentación audiovisual.
A Vicepresidenta da Deputación de Lugo, Maite Ferreiro, explicou que “trátase de exemplares adquiridos polo Servizo de Publicacións co obxectivo de apoiar a produción editorial en galego e colaborar na divulgación da vida e da obra de Fernández del Riego, ofrecendo aos centros de ensino recursos que consideramos de interese para traballar sobre a súa figura”. “Queremos tamén con isto recoñecer e suliñar a implicación e o interese que a comunidade educativa pon na celebración dunha data fundamental para a lingua e a cultura galega”, engadiu.
Xunto aos libros ao redor de Fernández del Riego, remitíronse aos centros exemplares das últimas publicacións editadas e participadas polo Servizo de Publicacións da Deputación , como Aquí non pasa nada de Juan Castro Lodeiro, que repasa a historia da creación musical lucense, ou Nós tamén temos historia, un traballo do alumnado do IES Lucus Augusti que recompila historias familiares.
