O xogo que pretende dinamizar o turismo e atraer visitas ao Museo de Olería de Niñodaguia preséntase como alternativa innovadora e parte da iniciativa do Consorcio de Turismo Ribeira Sacra ampliando deste xeito a oferta que iniciou no 2020 coas rutas de escape “Búskalo en Ribeira Sacra”.
Sobre unha reprodución dun torno oleiro de Niñodaguia, o hall escape “Operación Monte do Barro” segue a dinámica dos clásicos escape room, onde o grupo debe resolver as distintas probas que se lle formulan, nun tempo limitado, para conseguir o premio final, “salvar a olería de Niñodaguia da súa extinción”; un xogo co que achegar a identidade e cultura dun pobo a un público que non frecuenta habitualmente este tipo de espazos.
Está indicado para grupos de entre 2 e 8 persoas (parellas, grupos de amigos, familias…) e a idade mínima recomendada é de 7-8 anos. As reservas poden facerse a través da páxina web do Consorcio de Turismo.
É o primeiro xogo deste tipo instalado de forma permanente nun museo español. A iniciativa está financiada, con cargo ao Plan de Sostibilidade Turística en Ribeira Sacra, pola Secretaría de Estado de Turismo, a Axencia de Turismo de Galicia e o Consorcio de Turismo Ribeira Sacra.
