A xerente da Fundación Artesanía de Galicia, Elena Fabeiro, visitou este venres a Feira Outrora, que conta co apoio da Xunta co obxectivo de contribuír á posta en valor dos oficios artesanais e de visibilizar a marca Artesanía de Galicia.
No programa de actividades incluíanse catro obradoiros artesanais para todos os públicos. Os artesáns María José Martínez e José Antonio Carrera, de Artesanía Chuschús, encargáronse dos obradoiros de encadernación á xaponesa –no que elaboraron un caderno– e outro sobre gyotaku e transfer. O gyotaku é unha técnica na que se utiliza o peixe como prancha de gravado e o transfer consiste en facer unha impresión sobre madeira.
Outrora 2023 / Consellería de Economía
Pola súa banda, o ceramista, Carlos San Claudio impartiu un taller de torno oleiro no que cada persoa viviu a experiencia do torneado do barro utilizando como ferramenta o torno oleiro. Mentres que a artesá, Leonor Díaz, de Como pez en el agua, ofreceu un obradoiro de pintura sobre madeira.
Esta cita coa tradición contaba con actividades para os máis cativos pola tarde e amenización musical durante toda a xornada. Xoán Curiel ofreceu un concerto na capela do Ecce Homo e xa pola noite celebrouse o tradicional e popular “Isco no guizo” para pechar a xornada con Dj Vizcaíno.
Outrora 2023 / Concello de Bóveda
