A narradora Antía Vázquez, acompañada polo músico André Espiñeira, será a encargada de presentar a figura do Apalpador nos concellos da provincia. Segundo di a tradición, estamos a falar dun carboeiro de barba vermella que baixaba das montañas ás vilas a noite do 24 ou o 31 de decembro para tocar o ventre das crianzas e comprobar se comeran suficiente durante o ano, deixando ao seu carón agasallos e castañas e desexos de felicidade e comida.
A súa historia transmitiuse especialmente na zona do Courel e do oriente ourensán. Na última década, asociacións e colectivos culturais de distintos puntos de tomaron a iniciativa para recuperar este personaxe e as lendas e ritos que a rodean.
Iria Castro, en representación da Área de Cultura da Vicepresidencia da Deputación de Lugo, destacou na presentación da actividade que esta institución deseñou un calendario de visitas a varios concellos “co obxectivo de achegar a nenos e nenas esta figura do Nadal galego e a súa historia” e valorou “a oportunidade que esta personaxe ofrece para reivindicar as nosas tradicións e tamén valores ligados ao coidado do territorio”.
O ESPECTÁCULO
A filla do coñecido Apalpador toma o relevo do seu pai e baixa das montañas para encontrarse coas crianzas da provincia nun formato de contacontos musicado e interactivo onde se mesturan cantigas, lendas e dinámicas.
Estará acompañada polo seu irmán músico André para mergullarse con cancións da súa misteriosa historia. Ademais, levará froitos que recolle durante todo o ano e agasallos fabricados por ela mesma para entregar aos nenos e nenas neste Nadal.
CALENDARIO NO SUR DE LUGO
SAMOS
Organiza o CEIP de Samos. A actividade será no comedor escolar o 21 de decembro.
O SAVIÑAO
Asociación Lavandeira: Local Social de Currelos, 23 de decembro ás 16:30 horas.
LÁNCARA
Asociación Cultural Val de Láncara: 26 de decembro na Antiga Escola ás 17 horas.
