O próximo 24 de agosto celebrarase en Chantada o Folión de Carros, como é tradicional desde, cando menos, o século XIX. Nesta ocasión o alumnado do CEIP Xoán de Requeixo presenta as súas propostas de carteis.

Alumnado e profesorado realizaron unha actividade para que os máis novos deseñaran carteis anunciadores do Folión de carros 2024, incluíndo nas súas creacións algún dos símbolos principais desta celebración como o carro, xugada, oficios tradicionais ou tarefas do campo.

O 24 de maio, tanto autores como os seus profesores Teresa, Jesusa e José Castor fixeron a entrega protocolaria dos traballos a Manuel J. Vázquez Regal, Presidente da Asociación Cultural Amigos do Folión. O acto tivo lugar na Aula Aberta do CEIP Xoán de Requeixo.

O alumnado entregou un total de 44 carteis. Estes traballos formarán parte da Mostra “O folión de Chantada a ollos da infancia”, que se poderá ver durante o mes de xuño na casa da Cultura de Chantada. Algúns destes traballos feitos polos nenos e nenas serán utilizados, ademais, para deseñar a imaxe do mural sobre o Folión que se fará, por oitavo ano consecutivo, o vindeiro mes de agosto.