Este venres 5 de xullo presentouse en Sarria a terceira edición de UltreiaEtSuseia, evento que se desenvolverá en Sarria entre o 15 e o 20 de xullo. O acto contou coa presenza de Jorge López de Etiqueta Negra, coordinador do evento, Silvia Mondelo como portavoz de UltreiaEtSuseia, César No como concelleiro de Cultura, e Carmen José, directora territorial na provincia de Lugo da Consellería de Emprego, Comercio e Emigración.
Ultreia et Suseia, cuxo nome fai referencia ao histórico saúdo no Camiño de Santiago e que se pode traducir do latín como “Segue adiante, máis arriba”, ten un cartel de actividades conformado totalmente por artistas galegos.
ACTIVIDADES PROGRAMADAS
Así, poderase gozar de espectáculos de narración, dos paseos teatralizados de carácter didáctico Camiñografías e as dúas grandes novidades deste ano: Contos Sonoros, que unen música e narración e A Romaxe do Camiño, unha xornada de música que durará todo o día e que servirá como espazo de confraternización para persoas de diferentes sensibilidades nun espazo de unidade que pechará o festival e que contará tamén cun xantar popular.
A única actividade de pago o espectáculo cómico ‘LevelUp’, onde o humorista galego David Perdomo fai un repaso aos seus 20 anos de carreira. Será o venres 19 de xullo no Meigallo ás 21:00 horas. As entradas xa están á venda en Ataquilla.
Nesta edición, as asociacións de culturais da comarca de Sarria gañan máis protagonismo tendo a 6 presentes no programa. Repiten do ano pasado Peleriños, Meigas e Trasgos e Rúa da Música e súmanse Rebuldeira Teatro, a Banda Municipal de Sarria e a Banda Comarcal de Sarria, que participarán de maneira activa en diversas actividades do festival.
O evento, coordinado por Etiqueta Negra, conta co Concello de Sarria como patrocinador principal e o patrocinio institucional da Consellería de Cultura, así como a colaboración da área de Cultura da Deputación Provincial de Lugo.
CONTOS SONOROS
Contos Sonoros é un formato que suma narración e música, de forma que se cre o contexto máis propicio para que posteriormente as historias cheguen mellor ao imaxinario dos presentes. O 16 de xullo unirán forzas Carmen Conde e a Banda Comarcal de Sarria e outro o día 18 farán o propio Celso Sanmartín e a Banda Municipal de Sarria.
Estas actuacións desenvolveranse no Paseo do Malecón.
CONTOS PARA PÚBLICO INFANTIL
O festival mantén os espectáculos de narración infantil celebrados no Parque do Chanto. O 16 de xullo Bea Campos interpretará ‘A Meniña dous tres Osos’, unha divertida proposta con marionetas e cancións baseada nun conto clásico da literatura infantil. O día 18 será a quenda de César No, que ofrecerá unha sesión de contos interactiva para os máis pequenos que terá aos animais como protagonistas.
CAMIÑOGRAFÍAS E A ROMAXE DO CAMIÑO
Camiñografías é un formato único e exclusivo de Ultreia Et Suseia que consiste en paseos teatralizados que mostran a historia de Sarria, a súa comarca e a súa relación co Camiño de Santiago de que xunta música con artes escénicas. Estas actividades, un dos grandes reclamos do festival, partirán do Centro histórico e estarán conducidas por Silvia Mondelo. Como novidade, contarán coa presenza de influencers galegos dando apoio na parte escénica. O 15 de xullo participarán Pepe e Lucas, mentres que o día 17 fará o propio Pablo Meixe. Entre ambos contan con máis de 3 millóns de seguidores en redes sociais. Ademais, participarán as asociacións culturais Peleriños e Meigas e Trasgos achegando música e baile tradicionais e Rebuldeira Teatro en materia de artes escénicas.
Outra novidade moi esperada desta edición é a Romaxe do Camiño, unha xornada que contará cun xantar popular, obradoiros de baile con Peleiriños e Meigas e Trasgos, e música. Poñerá o ramo ao ciclo cultural o 20 de xullo na Sociedade da Unión, durará todo o día e servirá como espazo de confraternización para persoas de diferentes gustos e sensibilidades. No apartado musical participará a sarriá Carmela, que actuará por primeira acompañada por banda e Russ, unha das DJ de referencia a nivel galego e tamén Eris Mackenzie.
