A deputada de Cultura Iria Castro, acompañada pola tenente de Alcalde, Gloria Prada; o concelleiro de obras, José Luis Losada; e os 2 concelleiros do BNG na corporación municipal do Concello de Monforte, Emilio Grande e Manuel Luaces, inauguraron o pasado 1 de outubro a exposición “A Casa de Galicia. 50 anos da casa de Rosalía”. A mostra chega a Monforte no marco dunha itinerancia promovida pola Vicepresidencia da Deputación e que suma máis dunha vintena de localidades. Poderá verse na Praza do Campo de San Antonio ata o 14 de outubro.
Iria Castro agradeceu o interese do goberno municipal por esta exposición “que contribúe a ampliar o coñecemento sobre Rosalía de Castro e sobre o proceso de creación da Casa da Matanza” e explicou que “a itinerancia da mostra procura a presenza na rúa e nos espazos comúns dunha autora que é referente cultural, pero tamén feminista e de compromiso social, como facemos con outras iniciativas como a realización de murais homenaxe en centros educativos”.
A CASA DE GALICIA. 5O ANOS DA CASA DE ROSALÍA
A mostra, producida pola Fundación Rosalía e comisariada por Pepe Barro, autor da última renovación museolóxica da Casa-Museo de Rosalía de Castro, está formada por paneis inseridos nunha estrutura que evoca distintas estancias dunha casa.
O contido, elaborado con reproducións de documentos, fotografías e textos que repasan a historia do propio edificio e do esforzo colectivo que impulsou a súa apertura como museo, articúlase en seis capítulos diferenciados:
– A casa e o tren: o porqué da elección da morada.
– Rosalía na Casa: a escritora vive alí entre 1882 e 1885.
– Unha Casa santuario: as iniciativas da compra entre 1900 e 1940.
– A causa da Casa: Xosé Mosquera e a compra en 1946.
– O Padroado da Casa: Galeguistas, progresistas e “ben vistos”.
– A Casa de Galicia: Entre 1971 e 1972, ábrese a Casa coas achegas de miles de galegas e galegos.
