O mes de outubro empezou en Quiroga con actividades interesantes como foron o espectáculo de regueifas realizado conxuntamente con Ribas de Sil o pasado día 11, e tamén a andaina contra o cancro de mama que tivo lugar este venres 18.
En adiante, destacar a Viaxe a Santiago grazas á iniciativa do Centro Dramático Galego bautizada como “Sobes ao autobús do teatro?”, que levará a un grupo de veciñas e veciños de Quiroga a ver a obra “Terceiro Acto”. Será este sábado 19 de outubro, tendo ademais a oportunidade de facer algo de turismo por Compostela ata a hora da función que é ás 18:00 h. As persoas participantes teñen o bus de balde.
O 23 deste mesmo mes a Casa da Cultura acollerá un espectáculo dentro do Ciclo Ler Conta Moito baixo o título “Literatura afinada”, e o 27 unha excursión organizada polo CIM de Quiroga levará a un grupo de mulleres de excursión polos canóns do Sil. Como remate a outubro, un novo Faladoiro no Centro Social, o mércores 30 ás 18:00 h., e coa “Aceptación” como tema central.
NOVEMBRO
O mes de novembro vén cargado tamén de diferentes actividades. No que respecta ao teatro haberá 2 funcións. Unha o día 10, “Na procura dun traballo”, a cargo da compañía Metátase e dentro do Circuíto de Teatro Afeccionado que impulsa a Área de Cultura da Vicepresidencia 1ª da Deputación de Lugo; e outra o 24 a cargo dos Trocos de Vilaba e baixo o título “Un safari xeitoso”. Tamén dentro do programa devandito da Vicepresidencia 1ª do organismo provincial.
Neste mes, o CIM de Quiroga organiza 2 actividades. O día 25 conmemorará o día da non violencia contra as mulleres e o 30 unha viaxe a Ourense para ir ver a obra “La Celestina”.
Un novo Faladoiro, organizado dende Servizos Sociais e co tema aínda por desvelar, terá lugar o mércores 27 ás 18:00 h.
DECEMBRO
O Teatro será o protagonista absoluto no derradeiro mes do ano grazas ao impulso das Áreas de Cultura e de Dinamización Lingüística do Concello de Quiroga. Haberá funcións os días 4, 20, 27 e 29.
Día 4: “Castelao”, obra de Culturactiva orientada ao alumnado do CEIP de Quiroga. Será ás 12:30 h. no Auditorio Municipal e chega da man da Área de Cultura da Vicepresidencia 1ª da Deputación de Lugo.
Día 20: “Masculino singular”, a cargo de Satori Teatro e dentro do Circuíto de Teatro Profesional da Área de Cultura da Vicepresidencia 1ª da Deputación de Lugo. No Auditorio Municipal ás 20:00 h.
Día 27: “O vixiante dos soños”. A compañía que interpreta esta peza é Ubú Teatro e chega polo Circuíto de Teatro Profesional da Área de Cultura da Vicepresidencia 1ª da Deputación de Lugo. No Auditorio Municipal.
Día 29: “O auto do Castromil”. Producida por Producións Teatrais Excéntricas e con horario por confirmar no Auditorio Municipal. Conta co apoio da Área de Cultura da Vicepresidencia da Deputación de Lugo.
O Festival de Nadal, realizado pola Escola de Música Moderna será o 19 de decembro.
