Durante o mes de novembro e decembro, o fotógrafo Xaime Cortizo convida a coñecer e gozar dunha colección de fotografías que terá na Casa da Cultura de Taboada.

A mostra presenta unha colección de fotografías que simbolizan o seu percorrido persoal na procura constante de beleza e harmonía. A exposición, que se inaugura este sábado 16 de novembro ás 13:00h, percorre o camiño que iniciou cos seus primeiros traballos en fotografía analóxica ata chegar ás paisaxes da Ribeira Sacra, onde agora exerce como viticultor.

As imaxes inclúen lugares emblemáticos de Galicia e unha selección de instantáneas da súa obra Gárgolas de Compostela. Con esta mostra, Xaime pretende ofrecer unha nova visión sobre o vínculo profundo entre o ser humano e o seu entorno natural e cultural.

Na inauguración ofrecerase unha degustación de produtos locais e tamén haberá un brinde con viños da Ribeira Sacra, nun tributo á riqueza natural e cultural.