A moción aprobada polo BNG e o PSOE recollía que os conservatorios municipais, pese a ofrecer ensinanzas musicais regradas e titulación oficial, son financiados exclusivamente polos concellos, situación que resulta insostible, especialmente cando unha parte importante do alumnado procede doutros municipios.

Así o pleno acordou que a Xunta asuma plenamente a xestión e o financiamento dos conservatorios municipais, responsabilizándose do seu mantemento, dotacións e persoal. Ata que isto sexa unha realidade, esixe que se convoquen axudas económicas para os concellos, que se facilite a cobertura das prazas vacantes mediante as listaxes autonómicas e que se proporcionen os recursos necesarios.

Ademais, aposta pola creación dunha rede de conservatorios profesionais comarcais que garanta unha oferta equilibrada en todo o territorio galego, tendo en conta a proximidade xeográfica e as necesidades locais. Neste proceso, defende que é imprescindible escoitar ás direccións dos centros, ás comunidades educativas e aos concellos afectados.