A delegada do Goberno en Lugo, Isabel Rodríguez, vén de recoñecer a excelencia da Biblioteca Municipal de Vilalba polo seu premio María Moliner. Un recoñecemento que vai acompañado de 2.777,77 € e premia o seu destacado labor no fomento da lectura e a inclusión social grazas ao seu proxecto “Redes de saber”. Así mesmo, felicitou e recoñeceu o bo labor das outras Bibliotecas galardoadas na provincia de Lugo: Sober e Ribadeo.

O premio María Moliner, impulsado polo Ministerio de Cultura, recoñece cada ano aos mellores proxectos de animación á lectura en bibliotecas públicas de municipios de menos de 50.000 habitantes.

SOBER, UN DOS TRES CONCELLOS PREMIADOS

A Biblioteca Municipal de Sober, que tamén recibirá os 2.777,77 euros, acada este ano o seu 6º María Moliner. Faino grazas ao seu programa ‘Sober coa lectura’, que inclúe as súas “Merendas con contos” dos venres tarde, e o seu “Faladoiro dos luns”.

COMPROMISO DO ESTADO COAS BIBLIOTECAS MUNICIPAIS

A subdelegada sinalou que este investimento é unha mostra máis do compromiso do Goberno co desenvolvemento cultural e social na provincia, fortalecendo o labor das bibliotecas como centros educativos e de cohesión comunitaria.

Con este tipo de iniciativas, o Goberno aposta por garantir o acceso igualitario á cultura e o coñecemento en todos os territorios, especialmente nas zonas rurais, consolidando as bibliotecas como espazos de inclusión e creatividade para todas as xeracións.