Dende a Concellería de Cultura do Concello de Ribas de Sil definen de “éxito de público” a primeira de varias charlas abertas ao público que tivo lugar este mércores 23 de xullo no exterior da aula de pesca da praia fluvial de San Clodio.
Dedicada á historia do tren, a conversa empezou ás 9 da tardiña e durou uns 45 minutos durante os cales falouse dos trens na historia de Ribas de Sil. Trens que trouxeron, como noutros lugares, esperanza de modernidade a finais do século XIX. “Nun círculo arredor do estanque, pechado polo mestre Manuel Cao, quen dirixiu a conversa, compartíronse lembranzas e coñecementos sobre o pasado ferroviario da vila”, comentan fontes do concello.
Como anécdota, Anxo, un dos mozos da vila e alumno de ESO, tomaba notas das cousas que máis poden sorprender a un adolescente do 2025: historias que nos levan á década dos oitenta… de dous séculos atrás. O público, local e visitante, participou activamente lembrando as casillas, os traballadores –case trinta na estación–, os oficios, o quiosco e mesmo os accidentes.
“Manuel Cao fixo un magnífico percorrido pola historia do ferrocarril en San Clodio, incluídos os medos que as xentes tiñan cando chegou”, comentan tamén dende o concello.
As “Conversas de verán” volverán o vindeiro xoves 31 de xullo, neste caso baixo o tema: “A memoria da Praia Fluvial e acontecementos históricos”.
