Este venres 8 de agosto, a Festa da Mocidade de Taboada, abría as Festas dos Milagres que rematan este luns. A organización fala de rotundo éxito na xornada inaugural e estima que participaron da Festa da Mocidade unhas 3.500 persoas.

A Festa da Mocidade comezaba a última hora da tarde coa tradicional Ruta de Bares, que este ano mudou o traxecto e arrincou dende o Bar Rincón. A charanga de Chantada Faro Brass foi a encargada de animar a ruta, que fixo paradas no Scala, Rián, Devezo, Urdi, Mencía, Santa Lucía e Mario. Centos de mozos e mozas seguiron á charanga de bar en bar, animando a vila.

A ruta remataría cara as 21:30 horas cos participantes chegando ao Campo da Feira, onde a organización da Festa da Mocidade, a Asociación Madialeva O!, tiña todo preparado para a cea, que ía incluida no prezo da camiseta. Este ano vendéronse más 550 camisetas batendo tamén récords.

Heredeiros da Crus eran o prato forte dunha noite, na que todas as bandas fixeron moverse ao público. Os vigueses Residuos Radiactivas foron os primeiros en actuar, seguidos dos Rastreros de Chantada, que tiñan unha chea de fans nas primeiras filas.

Os Heredeiros da Crus levaron ao éxtase ao público, e os de Ribeira dérono todo sobre o escenario. O grupo xa estivera nunha Mocidade, hai 27 anos, e a banda lembrouno varias veces.

Os do Morrazo, Quinkillada, recibiron a testemuña dos Heredeiros, e rapidamente fixéronse co público, ao que puxeron a bailar cumbia sen descanso. E, para rematar a noite, The Palangans!

Tempo tamén para a lembranza e a homenaxe a Marcos Neira, que coa banda dos Cuchufellos foi asiduo da Festa da Mocidade ata o seu pasamento. A asociación Madialeva O! quixo rendirlle homenaxe agasallando á súa muller e aos seus fillos cun collage feito con fotos de Marcos nas súas visitas á Mocidade.

Festa da Mocidade Taboada 2025 (organización) / Mocidade Taboada