As visitas guiadas para coñecer a zona de ámbito xudeu de Monforte, a realizar o vindeiro 7 de setembro, intégranse dentro do programa do Verán Cultural organizado polo Equipo de Goberno do Concello de Monforte. Contarán coas explicacións do investigador monfortino Felipe Aira, serán de balde e durarán unha hora e media.
RED DE JUDERÍAS DE ESPAÑA-CAMINOS DE SEFARAD
Monforte de Lemos pertence, xunto con outras 20 cidades e poboacións de España, á Asociación da Red de Juderías de España-Caminos de Sefarad, o cal representa un recoñecemento ao seu rico pasado medieval e en particular á pegada hebrea no mesmo. Pertencer a esta asociación supón contar con actividades que permiten a divulgación do patrimonio histórico e artístico da cidade.
XORNADA EUROPEA DA CULTURA XUDÍA 2025
O lema da Xornada Europea da Cultura Xudía proposta pola Red de Juderías para este ano 2025, e impulsada pola Asociación Europea para la Preservación y Promoción de la Cultura y el Patrimonio Judíos, é “el pueblo del libro”. Unha temática que pretende transmitir que cada persoa é un libro e xuntos formamos unha biblioteca viva.
Ponse en valor o xeito de preservar a herdanza xudea a través da narración, do estudo e do diálogo, resaltando a universalidade deste legado para afirmar que a tradición textual xudea pertence a todos os que se relacionan con ela, independentemente do idioma, os antecedentes ou as crenzas.
