O teatro volve este xoves 23 de outubro ao Edificio Multiusos de Monforte dentro da programación que fai a Concellería de Cultura, Ensino e Xuventude do Concello de Monforte de Lemos, dentro das actividades da Rede Galega de Teatro e Auditorios. Farao no Multiusos ás 20:15 h. sendo o prezo das entradas de 5 € na tarifa xeral, e de 3 € no caso de estudantes, desempregados e xubilados.
A compañía ‘Fulano, Mengano e Citano’ representará a obra “O que hai que ver!”, cun texto de Manuel Pombal, Manuel Botana e Suso Pando, e baixo a dirección de Manuel Pombal. O elenco artístico está formado polos actores Marcos Alonso, Suso Pando e Manuel Pombal.
“O que hai que ver!” pon en escena unha serie de historias cheas de humor “nas que o espectador sentirase protagonista e partícipe directo, saíndo do teatro con ganas de volver”, din dende a compañía.
O Alcalde, José Tomé Roca, “anima aos monfortinos e monfortinas a acudir ó Multiusos e participar destas actividades, dentro da aposta decidida que este goberno fai pola cultura, e neste caso, polo teatro galego”.
CALENDARIO DAS VINDEIRAS OBRAS
O ciclo continuará o xoves 6 de novembro, con “Un deus salvaxe”, da compañía Talía Teatro, e a seguinte cita será xa o xoves 27 do mesmo mes coa compañía Antagonista Teatro que representará “Insubmisa”.
Pecha o ciclo teatral o 4 de decembro a peza “Helen Keller, a muller marabilla?”, do Grupo Chévere.
