O BNG de Quiroga, continuando coa celebración do 75 cabodano do falecemento de Castelao, anima agora á participación da veciñanza para honrar a súa figura propoñendo que lle fagan chegar frases ou viñetas do ilustre galeguista que despois serán compartidas no seu perfil das redes sociais Facebook e Instagram.
Os e as participantes terán que facer chegar a viñeta ou a frase de Castelao preferida e indicar porque é a máis querida enviándoas por correo electrónico ao enderezo quiroga@bng.gal antes do 31 de outubro.
O 3 de novembro compartiranse nas redes sociais escollidas por cada participante e esperarase ata o día 13 do mesmo mes para que a xente vote con ‘gústames’ pola que considere mellor escolla.
PREMIOS
Feito o reconto de gústames alcanzados ata o 13 de novembro escolleranse os/as 2 participantes con máis puntuación en Facebook, e o mesmo para a rede social Instagram. Os primeiros ou primeiras clasificadas terá dereito a un vale de 50 € e os segundos/as outro por importe de 30 €. Tras contactar co BNG de Quiroga os/as gañadores/as terán que informar do establecemento local onde vaian facer o gasto.
Con esta iniciativa o BNG de Quiroga quere celebrar o Ano Castelao coa veciñanza e ao mesmo tempo apoiar ao comercio local, lembrando xa de paso a toda a xente que non se esqueza nunca de que “o que teñamos no concello non o busquemos fóra”.
