Ademais das sesións de contacontos, as instalacións da Biblioteca son visitadas habitualmente polo alumnado dos centro de ensino, nesta tempada traballouse co CEIP Eloísa Rivadulla que visitaba as instalacións en horario de mañá. Este tipo de actividades prográmanse previo acordo entre os centros e a Biblioteca, “É de agredecer este tipo de iniciativas do profesorado que achegan as distintas aulas á Biblioteca, e aínda que moitos xa son usuarios habituais sempre hai algún alumno/a que non coñece as instalacións. É un gusto ver aos centros tan activos coa Biblioteca”, destaca a concelleiro de Cultura, Manuel Diéguez.

Actualmente, a Biblioteca de Chantada conta con 1425 persoas usuarias inscritas, das que 979 son adultas, 443 infantís e 3 institucións. Nos últimos tempos o préstamo domiciliario é o servizo máis habitual e a novela actual o máis demandado por usuarios/as adultos/as, Tamén se move cada vez máis o libro infantil, onde o máis solicitado son os cómics de Policán e coleccións como os futbolísimos, Unicornia, Mortiña ou Amanda Black. Tamén funciona bastante ben a sección de libros para bebés.

As persoas usuarias que contan con carné da Biblioteca teñen acceso a documentos electrónicos e audiolibros a través de eBiblio, un servizo gratuíto de préstamo de libros electrónicos en liña, coordinado e impulsado pola Subdirección Xeral de Coordinación Bibliotecaria do Ministerio de Cultura e Deporte en colaboración coa Rede de Bibliotecas de Galicia, así o carné da Biblioteca de Chantada permite acudir a calquera Biblioteca da Rede.

A Biblioteca de Chantada ten en marcha, ademais, dous clubes de lectura, un con Albores de lectura fácil, os mércores de 10:00h a 11:00h para ler en voz alta os libros; e o club de lectura de adultos que se reúne unha vez ao mes para comentar un libro que se lle facilita ao grupo e que se pide á Biblioteca de Galicia ou ao Forum Metropolitano da Coruña.