A Casa da Cultura Lois Pereiro de Monforte de Lemos acollerá a conferencia “A vila de Monforte e a Terra de Lemos na Idade Media”. O relator será Luis Manuel Ibáñez Beltrán, doutor en Estudos Medievais pola Universidade de Santiago de Compostela e a organización da actividade parte dos colectivos Amigos do Patrimonio de Lemos e O Colado do Vento.

“A charla abordará o proceso histórico que levou á consolidación de Monforte como centro político, relixioso e económico da Terra de Lemos durante a Idade Media, ofrecendo unha visión actualizada e rigorosa do pasado medieval da comarca”, explican dende a organización.

As entidades Amigos do Patrimonio de Lemos e O Colado do Vento son coñecidas na Comarca de Lemos polas súas iniciativas culturais para a divulgación e posta en valor do patrimonio histórico local.