Este sábado, 29 de novembro, ás 18:00h a Casa da Cultura de Quiroga acolle a proxección da película “Antes de Nós”. O filme sobre Castelao está dirixido por Ángeles Huerta e escrita por Pepe Coira e conta co patrocinio da área de cultura da Vicepresidencia Primeira da Deputación de Lugo.
Antes de Nós é unha historia que afonda nas emocións sobre Castelao antes de converterse no referente histórico que coñecemos na actualidade, pero sobre todo é unha historia sobre Daniel e Virxinia. Unha parella e dous momentos cruciais. 1918, cando Castelao deixa a súa praza de funcionario en Pontevedra para traballar como médico en Rianxo durante a gripe española. Un heroe para o pobo, pero un home ausente para a súa muller, Virxinia. E 1929, cando o matrimonio percorre Bretaña poucos meses despois da perda do seu único fillo. Dous seres rotos e un vínculo que xa non se entende. Unha viaxe que os vai unir para sempre.
A película Antes de Nós –con Xoán Fornelas como Castelao e Cris Iglesias no papel de Virxinia– foi rodada nos lugares orixinais que pisou o autor, seguindo as situacións descritas no guión. Rianxo e Pontevedra, dúas localizacións fundamentais, conservan hoxe a mesma esencia de hai máis de cen anos, ofrecendo unha fidelidade visual e emocional única. Ademais, a rodaxe trasladouse a outros puntos emblemáticos como A Estrada, Santiago de Compostela e Muros, que permiten recrear con autenticidade a Galicia de comezos do século XX.
Esta é a terceira obra da directora Ángeles Huerta. A súa primeira longametraxe co documental creativo Esquece Monelos obtivo a Mención Especial do Xurado en Documenta Madrid, tres premios Mestre Mateo e estivo nomeado aos Premios Feroz 2018. E na Seminci de 2022 estrea a súa primeira película de ficción, O corpo aberto, merecedora de 12 premios Mestre Mateo na edición do 2023, incluíndo mellor película, dirección e guión.
