O I Certame Literario Xosé de Arxeriz, dirixido ao alumnado do último ciclo de educación primaria e de calquera ciclo de ESO de centros educativos galegos, rematará o vindeiro 12 de xuño coa entrega de premios. O devandito concurso, organizado pola Fundación Xosé Soto de Fión –xestora do Ecomuseo de Arxeriz no Saviñao– homenaxea ao fundador desta entidade, José Soto Rodríguez, quen asinou co pseudónimo de Xosé de Arxeriz as súas obras literarias.

O certame ten como obxectivo “fomentar a creatividade literaria en lingua galega e promover valóres culturais, etnográficos, históricos e ecolóxicos de Galicia”, e nesta primeira edición presentáronse 67 relatos.

O día de entrega de premios, os alumnos gañadores recolleran os seus premios e tanto eles como o resto de alumnado das súas respectivas clases farán unha visita guiada ao Ecomuseo de Arxeriz e unha viaxe en catamarán polo Miño.

PREMIOS

Os relatos premiados na categoría de primaria foron: A filla do mar, de Carmen Otero (colexio Eloísa Rivadulla de Chantada), e Martiño e Uxío, dous heroes entre ou lume, de Valentina Aguado Sánchez (CEIP de Quiroga). Na categoría de secundaria, os galardóns foron para A pedra, de Yassin Amarante O Hakimy (Instituto Val do Asma de Chantada), e Xa cho conto mañá, dunha alumna do instituto Ramón Menéndez Pidal da Coruña.

O XURADO

O xurado do certame estivo formado por José Antonio Quiroga, presidente da Fundación Xosé Soto de Fión; Milagros Mondéjar Ovelleiro, presidenta de honra desta entidade e catedrática de grego; e Xabier Quiroga, escritor e profesor de lingua galega orixinario do Saviñao.