O Club de Lectura da Escola de Torbeo celebrará este domingo, 15 de novembro, ás 17:00 horas, a súa segunda xuntanza, despois da boa acollida da primeira convocatoria. A iniciativa, que naceu co propósito de fomentar a lectura e crear un espazo de encontro e intercambio cultural, está a consolidarse como unha proposta especialmente interesante nun núcleo rural de pequenas dimensións como Torbeo. A actividade constitúe un exemplo de como a cultura pode manterse viva e activa tamén nas pequenas aldeas.

Este domingo conversarase sobre a novela Azucre, da escritora galega Bibiana Candia. Antonio Paz dinamizará o intercambio de opinións, interpretacións e reflexións arredor da lectura durante aproximadamente unha hora. Unha das características máis destacadas desta iniciativa é o seu carácter aberto e participativo. Non é necesario residir en Torbeo nin pertencer á asociación veciñal para asistir.

O Club de Lectura é unha actividade organizada conxuntamente pola Asociación de Veciños de Torbeo (A.VE.TO.) e o Concello de Ribas de Sil, no marco da súa colaboración para dinamizar a vida cultural e social da parroquia. A Escola de Torbeo, recuperada como espazo de encontro e actividade comunitaria, convértese deste xeito nun escenario para o diálogo literario, a convivencia e a participación cultural.