A Carreira Río Mao en Bóveda destaca polo seu carácter solidario, de tal xeito que para inscribirse houbo que pagar 3 euros e entregar un quilo de comida. Tras a recollida de alimentos estes serán distribuídos a través dos xestores locais do banco de alimentos.

Este ano alcanzouse a XII edición e a saída tivo lugar no Muíño do Xil, ás 11:00 h. para as categorías inferiores e ás 12:15 h. para a categoría absoluta, cunha distancia a percorrer nesta última de 7.400 metros. A proba deste ano convocou preto de 200 corredores, na súa maioría da contorna aínda que houbo participantes chegados de Vilagarcía, As Pontes, Ferrol, Ourense ou Lugo. Os/as atletas das diferentes categorías percorreron, segundo as probas que lles correspondían, as distancias de 80, 200, 400, 1600 e 7400 metros. O corredor máis novo da competición deste ano tiña un ano e o máis vello contaba con 74.

A proba absoluta masculina foi gañada por Esteban Díaz Pérez, do Club Trieume de As Pontes, e a corredora local, Luisa González Somoza -do Club Horticelos-, gañou na categoría feminina. No segundo e terceiro posto do ‘podium absoluto masculino’ quedaron clasificados, por este orde, Víctor Estrada Pérez do Piñeira Team e Carlos López Moral do Club Atletismo A Gándara de Monforte; no seu equivalente feminino quedou segunda María Cedrón, do Atletismo A Gándara de Monforte, e de terceira, Teresa Corral Marcos que viña de Lugo e participaba como independente.