A praia fluvial do Val, en Mondariz, acollía na xornada do 26 de setembro a última proba para os/as participantes da Promoción Slalom galega 2021. Unha competición que se presentaba así mesmo como ‘Campionato Galego de Promoción Slalom’.
As augas calmas, pero moi duras, do río Tea, foron testemuñas dunha moi nutrida participación e dun novo éxito do Quixós. Tras dúas mangas, nas que se superaron os cen participantes, o club monfortino pode presumir de colocar a 7 piragüistas como os mellores de Galicia e de acadar o título de mellor equipo.
Como campións/campioas galegos/as quedaron: Jacobo en K1 e C1 infantil, Nerea en K1 infantil, Martín Prats en K1 alevín, Xoel Fernández en K1 benxamín, Antón Liñares e Abril Fernández en K1 prebenxamín.
Cómpre destacar tamén as medallas de prata para: Nerea en C1 infantil, Sara Inés en K1 e C1 alevín, Martín Prats en C1 alevín e Mateo en K1 prebenxamín.
E xa para rematar o reparto de medallas entre os padexeiros/as do Quixós, mencionar os 3 bronces acadados por: Marco Rodríguez en K1 prebenxamín, Rodrigo Morillo en K1 benxamín e Mara Ledo en K1 alevín.
