Sarria acollerá o 1 de novembro as finais da Copa Deputación de Fútbol Sala, patrocinada pola Vicepresidencia da Deputación de Lugo. O vicepresidente e deputado de Deportes, Efrén Castro, presentou o horario dos encontros acompañado por representantes dos equipos finalistas, do club sarriao Os Meigallos FS, do Concello de Sarria e da Federación Galega de Fútbol no pavillón José Mario González, onde se disputarán os partidos.

Efrén Castro felicitou “os equipos finalistas por superar as eliminatorias previas” e convidou “a achegarse a Sarria para ver en directo as finais que poñen o broche a unha competición na que participaron 39 equipos e que ofrece un escaparate e unha fonte de financiamento para os clubs de deporte base e afeccionado”.

Ademais dos premios por participar, os equipos finalistas reciben premios adicionais de 745 e 510 euros, para os equipos campións, e 260 euros, para os equipos subcampións, en función da categoría.

Horarios:

• 2ª División Masculina. Outeiro de Rei SD “B”-CD Cubelas FS. 16.00 horas.
• 1ª División Feminina. Burela FS “B” – Ribeira Lieders FS. 18.15 horas.
• 1ª División Masculina. Ribeira FS – Outeiro de Rei SD. 20.30 horas.