A primeira etapa da Volta a Galicia, o 12 de setembro, será unha contrarreloxo individual con saída na rúa da Liberdade e chegada na rúa Maior (fronte á Igrexa de San Salvador), e un percorrido de 7,1 quilómetros pola vila e a contorna da localidade. A proba comezará ás 18.00 horas.
O trazado deseñado para o 13 de setembro, segunda etapa da Volta a Galicia, con chegada e saída na rúa da Liberdade, conta con 160 quilómetros nos que os ciclistas percorrerán tamén outros concellos das comarcas de Sarria e Lugo como Samos, Láncara, O Páramo, O Corgo, Castroverde, Baralla e Lugo (Nadela). A proba iniciarase ás 12.00 horas cunha saída neutralizada.
Trátase dun itinerario de media montaña con terreo bastante rápido e rompepernas, con Montán (Samos) e Sobrado (Baralla) -portos de terceira categoría- como puntos máis altos do circuíto.
Arias destacou que a competición “nos permite desfrutar na provincia de Lugo dun auténtico espectáculo deportivo”, que ademais “ten unha boa repercusión económica e promocional nos concellos que percorre”. Ao longo das catro etapas os ciclistas atravesarán case 30 municipios galegos, oito deles lucenses – Sarria, O Páramo, Láncara, O Corgo, Lugo, Castroverde, Baralla e Samos –.
.
