O Concello porá a disposición de clubs e entidades deportivas monfortinas sen ánimo de lucro, 10 locais de propiedade municipal situados no Pavillón Municipal da Pinguela. Na pasada Xunta de Goberno Local, celebrada o luns 7 de outubro, aprobáronse as Bases reguladoras da convocatoria para o procedemento de cesión de uso de locais de titularidade municipal situados no Pavillón municipal da Pinguela.

Esta convocatoria ven motivada, subliña o Alcalde, “porque existe unha importante demanda de uso dos locais situados no pavillón polideportivo da Pinguela o que fai necesario aprobar un procedemento para regular de xeito ordenado a concesión de uso dos mesmos”.

Unha vez publicadas na web do Concello as bases desta convocatoria, o prazo para a presentación de solicitudes será de 10 días hábile, ata o xoves 24 de outubro.

Poderán solicitar a través desta convocatoria o uso dos locais situados no Pavillón Polideportivo da Pinguela, os Clubs ou Entidades Deportivas legalmente establecidas e inscritas no Rexistro Municipal de Asociacións Deportivas do Concello de Monforte, que non teñan ánimo de lucro, e que leven a cabo a súa actividade deportiva nalgún dos “Pavillóns Polideportivos” que o Concello de Monforte oferta para o seu uso durante o ano (Pavillón Polideportivo da Pinguela, Pavillón dos Institutos Río Cabe e Daviña Rei, Pavillón do IES Pinguela e Pavillón do CEIP A Gándara), ou ben na Piscina Municipal. Non poderán solicitar o uso dun local aquelas entidades que xa dispoñan dun local municipal noutra instalación deportiva, ou non deportiva, para os mesmos cometidos.

O uso dos locais cederase polo prazo dun ano prorrogable de xeito automático anualmente ata un máximo de 4 anos. Unha vez transcorrido o tempo de cesión o Concello de Monforte poñerá en marcha un novo procedemento para a cesión de uso dos locais. Todos aqueles clubs aos que lles sexa concedido o uso dun local poderán facer uso deste de luns a domingo entre as 8:00 e as 00:00 h.