As xeadas déronlle a benvida ao 2025 no sur de Lugo, tendo Monforte na madrugada do día 1 de xaneiro temperaturas baixo cero. Pois ben, un grupo nutrido de piragüistas do Club Quixós que non lle tivo medo a esta climatoloxía púxose “piragua á auga” para descender o río Cabe dende o Azud de Ribas Altas.
Ás 10:00 h. da mañá saía da súa base no Parque dos Condes un grupo de 14 piragüistas coa furgoneta do club e varios coches de familiares que quixeron acompañar no descenso, para dar apoio moral e sacar fotos. Sobre as 10:30 h. estaban no Azud de Ribas Altas para empezar dende alí o descenso do Cabe ata o embarcadoiro do Parque dos Condes. A temperatura era duns 2 graos baixo cero e a da auga duns 5-6 graos pero nin con esas estes atrevidos deportistas quixeron faltar a esta xa consolidada tradición de ano novo.
O descenso, aínda con moi pouco caudal este ano, ten como atractivos a contorna natural do percorrido e os saltos de auga. Os máis impresionantes son o que hai no azur, no punto de saída, e o que hai no Club Fluvial.
No traxecto, en paralelo e por pistas, foron acompañados por familiares e dous fotógrafos, os coñecidos ‘Montero’ e ‘Cortiñas’.
Sendo xa case as 12:00 h. da mañá chegaban os 14 piragüistas ao embarcadoiro do Parque dos Condes. Amosaban a satisfación de empezar o ano facendo deporte e desafiando as baixas temperaturas pero tampouco escondían o frío que pasaron, sobre todo os que probaron a auga con algún remollón. Como remate, unha vez cambiados, dúas nais agasallaron con galletas e chocolate aos presentes, agradecida recompensa que axudou a entrar en calor aos deportistas.
Como curiosidade comentar que entre os piragüistas atopábanse dous de Ourense que viñeron probar a experiencia e quedaron encantados.
