A pasada fin de semana celebrouse en terras pontevedresas, concretamente en Mondariz Balneario, a Copa Ibérica Slalom, competición na que se disputaban a 1ª Copa Galega Novas Promesas Slalom e a 1ª Copa Galega de Slalom Olímpico.
O río Tea foi o protagonista desta proba na que estiveron presentes, ademais de clubes galegos, outros procedentes de lugares como Portugal, Asturias, Euskadi, ou Salamanca. Houbo un gran número de deportistas que demostraron un alto nivel desafiando o complicado percorrido deseñado nas dúas xornadas para o descenso das augas bravas do río pontevedrés.
O club Quixós chegaba a Mondariz Balneario coas expectativas altas, aínda sabendo do complicado que sería alcanzar medallas. Tras unha primeira xornada clasificatoria –sábado 1 de febreiro– chegaba o domingo, día no que nunha soa manga se decidiu a clasificación final cun balance de 7 medallas invididuais e un terceiro posto por equipos para a expedición monfortina.
En relación ao resultado acadado cómpre salientar a achega das mulleres que, grazas ás súas 5 medallas individuais, impulsaron ao Quixós ata o terceiro posto.
MEDALLEIRO
O club gañador desta Copa Ibérica de Slalom foi o club anfitrión, o Tea Mondariz Balneario, quedando o Quixós como terceiro despois do equipo portugués do Amarao.
No que respecta a méritos individuais, volveron con medallas para Monforte: Sara Inés Varela, con 2 ouros en Cadete K-1 e C-1; Noa Díaz, con prata en C-1 senior e bronce en K-1 senior; Nerea Gutiérrez, prata en C-1 junior; Santi Díaz, prata en K-1 veterán; e Iván Gutiérrez, bronce en K-1 veterán.
