Chega unha oportunidade de poñerse a proba para aqueles e aquelas camiñantes e deportistas afeitos e preparados a roteiros de grandes distancias e altos desniveis. Trátase da coñecida como “Os 3000 do Courel”.
RUTA DEPORTIVA
A ruta, organizada por Coureleando e programada para o 21 de xuño, considérase de dificultade moi alta. Saíndo da Aula da Natureza de Moreda sube o quilómetro de Formigueiros, o medio quilómetro de Polín, o quilómetro de Penaboa/Piapáxaro e remata no Pontón co bucle do medio quilómetro de Coto. O punto de encontro inicial para desprazarse ata a Aula da Natureza é a Praza do Concello de Folgoso do Courel ás 7:00 h.
O percorrido é de 30 quilómetros, tendo en conta que hai 3000 metros de ascenso e 3000 de descenso (un total de 6000 acumulados). O tempo estimado para poder completalo é de 15 horas con paradas. Dificultade moi alta, insisten dende a organización, tendo claro que esta proposta deportiva está pensada “só para camiñantes habituados a grandes desniveis e distancias”. No que respecta ao terreo, este será mixto, con sendeiros, pistas, aristas e tramos técnicos. Os puntos de retirada serán: Moreda, Ferreirós de Arriba.
Material obrigatorio: zapatillas de trail en bo estado, mochila con comida lixeira, crema para o sol, gorra, frontal con pilas, auga (haberá puntos de recarga na ruta), roupa adaptada á climatoloxía dese día e sales minerais. Non obrigatorio, pero moi recomendable, levar bastóns.
“Se buscas un reto persoal, queres poñerte a proba ou estás adestrando para unha ruta noutras montañas, aquí está a ruta máis salvaxe de Galicia. Só un 50% dos que viñeron remataron, atréveste?”, di Guillemo Díaz de Coureleando.
PREZO, INSCRICIÓNS E GUÍA
O prezo para poder participar é de 20 € e o teléfono de contacto para as inscricións: 626 643 021. Como responsable da ruta estará o Guía e Técnico Deportivo de Media montaña, Guillermo Díaz.
