O conselleiro de Presidencia, Xustiza e Deportes, Diego Calvo, acompañado polo delegado territorial da Xunta en Lugo, Javier Arias, reuniuse co alcalde de Sarria, Claudio Garrido, para trasladarlle o compromiso da Xunta para a realización de melloras no campo de fútbol da Ribela e garantir así o cumprimento dos estándares de calidade esixidos tras o ascenso do equipo local á segunda RFEF.
Segundo se acordou na xuntanza, na que tamén estiveron presentes os concelleiros Félix Seijas e Carmen José López, asinarase un convenio no que o Goberno galego achegará máis de 500.000 euros, o 70% do investimento total entre o proxecto e as obras, estimado en máis de 700.000 euros.
A medida enmárcase no apoio da Xunta ás administracións locais e, especialmente, ás infraestruturas deportivas de carácter municipal. Así, o Goberno galego conta con diferentes liñas de axuda dirixidas especificamente á mellora destas infraestruturas ou que lle dan prioridade nos criterios de valoración. Trátase de garantir unhas instalacións coas mellores condicións de calidade, tanto para os deportistas como para as persoas afeccionadas, e fomentar así a práctica e o desfrute do deporte en Galicia.
Nesta liña, a Xunta impulsou en 2024 máis de 400 actuacións en instalacións deportivas, tanto de titularidade autonómica como municipal, cun orzamento global de 22 millóns de euros a través de axudas da Secretaría Xeral para o Deporte e de liñas específicas de apoio ás administracións locais.
