A cita deportiva corresponde á Regata Galega de prebenxamíns, benxamíns e alevíns K1 1.500 m, incluída no calendario da Federación Galega de Piragüismo. O rexedor, Héctor Corujo, pon en valor o potencial do encoro de Vilasouto para este tipo de competicións e para o desenvolvemento dos deportes náuticos e subliña a vontade do Concello de continuar traballando nesta liña. O alcalde engade ademais que “iniciativas deste tipo supoñen unha oportunidade para dar a coñecer o Concello e atraen tamén ás persoas que acompañan aos deportistas, o que contribúe a dinamizar a actividade local”.

A celebración desta nova cita dá continuidade ás competicións organizadas o pasado verán tamén no encoro de Vilasouto. Daquela, O Incio converteuse en sede da Liga Galega Infantil cunha regata que reuniu a máis de 200 deportistas, e o encoro acolleu tamén a sexta proba da XIV Liga Provincial de Piragüismo.

Estes eventos permiten comprobar o potencial do encoro para a práctica de deportes náuticos, nun espazo onde non estaba permitido padexar desde os anos noventa ata a súa recuperación en 2022. Ademais, reforzan a colaboración entre o Concello do Incio e a Federación Galega de Piragüismo para continuar impulsando a organización de probas deportivas no municipio.

Convenio piragüismo / Concello do Incio