A xornada pretende poñer enriba da mesa un tema moi importante para o futuro do país en xeral e de Galicia en particular, o despoboamento do rural. Abordaranse as terribles consecuencias socioeconómicas que se derivan e aportaranse ideas e propostas para frealo e/ou intentar reverter a situación.

O acto inaugural terá lugar ás 10:15 h. e o encargado de dar a benvida aos asistentes será Víctor Ledo Suárez, Secretario Xeral de CC. OO. De Industria de Galicia.

O foro desenvolverase coa disposición de tres mesas nas que os convidados e convidadas falarán sobre o tema proposto en cada unha delas acompañados/as dun moderador ou moderadora que dará paso aos intervintes e poñerá orde nas intervencións.

Na primeira mesa ás 10:30 h. falarase da ‘Situación actual do despoboamento’ onde destaca, entre outros, a presencia de Miguel Ángel Pérez Dubois, Director Xeral de Desenvolvemento Rural e Director de AGADER (Axencia de Desenvolvemento Rural).

Na segunda das mesas ou táboa redonda, ás 12:00 h. e xusto despois da pausa café, o tema a tratar será ‘Que medidas tomar para evitar o despoboamento’ e nela estarán presentes os voceiros/as de Medio Rural de diferentes partidos políticos. Polo PP estará Moisés Blanco Paradelo, polo PSG-PSOE Patricia Otero Rodríguez, Xosé Luis Rivas representará ao BNG e Antón Sánchez García ao grupo En Marea.

A terceira das táboas redondas está programada para as 13:00 h. e nela poñeranse enriba da mesa ‘Propostas de CC. OO. para evitar o despoboamento’. Os encargados de defender o tema serán José María Díaz Bustamante -Gabinete económico de CC. OO. De Industria- e Francisco Javier Velasco Cuevas -Responsable do Sector do Campo de C.C. OO. Industria-.

A continuación, ás 13:30 h. haberá un debate e ás 14:30 terá lugar a clausura da xornada que correrá a cargo do monfortino Francisco Conde López, Conselleiro de Economía e Industria.