O Tribunal Supremo dálle a razón ao Goberno galego e anula a sentenza emitida o pasado mes de outubro de 2019, que invalidaba un dos aspectos da norma galega para este tipo de aloxamentos referido á obriga de alugar a vivenda de forma íntegra.
O Executivo autonómico presentou en novembro de 2019 un incidente de nulidade entendendo que con esa sentencia vulnerábase o seu dereito á tutela xudicial efectiva, dado que a sentenza do Tribunal Supremo pretendía anular un artigo do Decreto 12/2017, de 26 de xaneiro, que xa estaba contido previamente na Lei 7/2011, de 27 de outubro. Revisado o fallo, o Alto Tribunal dálle a razón á Xunta e anula o fallo emitido, desestimando tamén deste xeito as alegacións presentadas por parte da Avogacía do Estado.
Chegados a este punto, o decreto da Xunta de 2017 que regula o alugueiro turístico permanece intacto e vixente de xeito que as vivendas turísticas e as vivendas de uso turístico en Galicia deben comercializarse sempre pola totalidade da vivenda e non por estancias como viñan reclamando a Avogacía do Estado e a Comisión Nacional dos Mercados e da Competencia (CNMC).
A Xunta amosa a súa satisfacción pola decisión xudicial, que avala a súa normativa, e aproveita para informar de que vén de introducir melloras na transparencia e publicidade destas vivendas e que intensificará o seu labor de inspección para garantir a seguridade, un marco de convivencia e impedir o intrusismo.
ANTECEDENTES
A tendencia de alugar unha vivenda habitual por días ou semanas con fines turísticos e a proliferación deste tipo de negocios a través de empresas que operan vía internet demandaba unha regulación normativa. A competencia para facelo deixouse nas mans das Comunidades Autónomas e así nace en Galicia o Decreto 12/2017, de 26 de xaneiro, de ordenación de apartamentos turísticos, vivendas turísticas e vivendas de uso turístico na Comunidade Autónoma de Galicia.
Este decreto foi recurrido na vía contencioso administrativa pola Avogacía do Estado e pola Comisión Nacional dos Mercados e a Competencia -CNMC- pero o Tribunal Superior de Xustiza desestimou o recurso. O fallo viña a dicir que o decreto da Xunta era respetuoso coa normativa e que contiña un nivel regulatorio mínimo.
Ante esta sentencia, os demandantes recurriron ante o Tribunal Supremo e este, no seu fallo -outubro de 2019-, anulaba a norma no contido de 2 dos artigos, o 4.2 e o 5.1. referidos á obrigatoriedade de comercializar a vivenda na súa totalidade e impedindo a súa cesión por estancias. Neste punto, os avogados da Xunta presentaron un incidente de nulidade -novembro de 2019- e o propio Tribunal Supremo, tras revisar o caso, anulou o seu fallo dándolle a razón ao Executivo galego e avalando a súa normativa.
