Durante tres semanas consecutivas, os usuarios da aula lucense participarán en sesións semanais que combinan vídeos formativos de curta duración coa presenza dunha persoa dinamizadora que guiará a actividade, resolverá dúbidas en tempo real e fomentará o diálogo grupal.
Esta combinación, xa testada no CeMIT de Cuntis con excelente acollida, permite romper coa pasividade da formación convencional en vídeo, reforzando o compoñente social e humano da aprendizaxe. O curso “Activa a túa vida dixital”, centrado en romper a brecha tecnolóxica, terá lugar os xoves de 11:00h a 12:00h na aula CEMIT de Carballedo.
- 16 de outubro: Alertas de emerxencia e contactos importantes no teu móbil.
- 23 de outubro: Aplicacións para a memoria e o exercicio mental.
- 30 de outubro: Que comer para manterse activo.
Con esta acción, o CeMIT de Carballedo convértese en referente na provincia de Lugo, ao integrar un modelo innovador de formación sénior que poderá replicarse proximamente noutros centros da rede galega. Este piloto representa unha oportunidade para observar de preto como se comporta o formato en contextos rurais e semirrurales, adaptando a metodoloxía ás necesidades reais do territorio. Este formato enmárcase dentro dunha estratexia de colaboración coa rede CeMIT para dinamizar os seus espazos tecnolóxicos a través de actividades accesibles, prácticas e adaptadas á realidade das persoas maiores.
