O Ministerio de Industria, Comercio e Turismo, de acordo con comunidades autónomas e entidades locais acorda dedicar 58,8 millóns de euros en 25 destinos turísticos de España, entre os que se atopa a Ribeira Sacra. O proxecto supón un respaldo á candidatura a Patrimonio Mundial. O plan está orientado a estruturar un conxunto de actuacións que, enmarcadas nas liñas da candidatura de Ribeira Sacra a Patrimonio Mundial, permitan garantir a sustentabilidade ambiental, económica e social no proceso de consolidación de Ribeira Sacra como destino turístico.
Un dos principais obxectivos do plan é a inclusión da Ribiera Sacra no Club de Produto Roteiros do Viño de España. Tamén se pretende desenvolver, promocionar e comercializar novos produtos turísticos sostibles, diversificando a oferta do destino e xerando novas oportunidades de emprego e riqueza: Vagalumes, Mindfulness, oficios, xeoloxía e arqueoloxía.
A decisión tomouse na Conferencia Sectorial de Turismo, que presidiu a ministra de Industria, Comercio e Turismo, Reyes Maroto, xunto ao secretario de Estado de Turismo, Fernando Valdés, e os conselleiros autonómicos do ramo, que conxuntamente acordaron dedicar 58,8 millóns de euros en 25 destinos turísticos co dobre obxectivo de modernizar a oferta en destinos pioneiros e activala en comarcas da España interior. O desenvolvemento do turismo contribuirá a afrontar o reto demográfico nestes destinos de interior, que aspiran a recibir unha maior afluencia de visitantes con capacidade de gasto, sen que esta actividade sexa prexudicial para o medio ambiente. No caso da Ribeira Sacra o investimento estará dirixido a dinamizar e organizar a súa oferta turística, potenciando o seu patrimonio cultural e natural.
Desde o Consorcio de Turismo aseguran que isto supón outra dose de ilusión para a posta en valor do territorio que, “agora require da implicación de cada un dos axentes do sector para que se convirta nunha realidade. A partir de aquí seguiremos os pasos que se nos vaian indicando por parte do Goberno Central e da Xunta de Galicia para avanzar de cara á sinatura dun convenio a tres bandas.”
