O delegado territorial da Xunta en Lugo, Javier Arias, sinalou que os apoios supoñen o 70% do investimento mobilizado para desenvolver accións de impulso á innovación, a dixitalización e a modernización dos establecementos.

Este programa promove axudas por distintos conceptos, compatibles entre si. En Lugo, a maior demanda rexistrouse no apartado de dixitalización, para facilitar a adaptación ao actual contexto económico e aos novos hábitos dos consumidores. En concreto na zona sur 10 comercios adheríronse á liña para mellorar os servizos que prestan á clientela a través de diferentes canles, con axudas para páxinas web comerciais, ferramentas de márketing 4.0, mellora da imaxe dixital, xestión de redes sociais e implantación de ferramentas de xestión.

Tamén se conceden a través desta orde achegas para a adquisición de equipamento ou ferramentas que melloren o produto final (3 na zona sur), ou para a modernización e adaptación de locais comerciais (1).

O delegado subliñou que a Xunta apoia “ao comercio de proximidade e aos artesáns, que nas circunstancias actuais están a realizar un gran esforzo por ser competitivos, apostando por modernizarse e incrementar a súa presenza online”.