A Secretaría de Acción Sindical de CC. OO. de Lugo fixo públicos os datos do paro de novembro, un mes malo en condicións normais e máis este ano coincidindo coa pandemia e peches da hostalería como o que houbo en Monforte.
Por comarcas, a que mellor comportamento tivo foi Sarria, única da zona sur que acadou baixar o número de desempregados/as no seu conxunto. Quedan con 1.251 tras descender en 16. Pola contra, na Comarca de Chantada aumentaron o paro en 38 persoas e quedan con 735; na de Quiroga subiron en 6 e quedan con 300; e finalmente na Comarca de Lemos que alcanzaron a cifra de 89 parados/as máis que no mes anterior sumando nestes momentos un total de 1.905.
OS NÚMEROS POR CONCELLOS
Comarca de Sarria: Concello do Incio, 56 parados/as (+9), Láncara 131 (+2), Paradela 44 (-2), O Páramo 51 (+4), Samos 42 (+4), Triacastela 27 (-4) e Sarria 900 (-29).
Comarca de Lemos: Bóveda 63 (+2), A Pobra do Brollón 78 (+8), Sober 130 (+14), Pantón 134 (+13), O Saviñao 171 (+7) e Monforte 1.329 (+45).
Comarca de Chantada: Carballedo 83 (+8), Taboada 117 (-5) e Chantada 535 (+35).
Comarca de Quiroga: Folgoso do Courel 51 (+5), Quiroga 193 (-2) e Ribas de Sil 56 (+3).
Os datos son preocupantes, e dende o sindicato CC.OO. “están convencidos de que se non fose polos ERTES, habería máis de 5.500 parados/as nas catro comarcas indicadas”. Así mesmo láianse de que “siga habendo algún empresario, ovella negra, que podendo acollerse a un ERTE para non despedir, optou polo despido”. Coñecedores destes feitos, indican que os puxeron en coñecemento do Xulgado do Social por considerar os despedimentos nulos e improcedentes.
