O coñecido como ‘Bono Turístico’ é unha iniciativa froito da colaboración da Xunta de Galicia e o Clúster Turismo de Galicia para fomentar a actividade e favorecer a desestacionalización a través do incentivo ao uso dos distintos servizos turísticos galegos por parte da cidadanía.
Aproveitando a terceira edición deste incentivo turístico, #QuedamosEnGalicia22, o delegado territorial do Goberno galego, Javier Arias, estivo de visita no hotel Áurea Palacio de Sober, un dos que se sumaron á campaña nesta parte da provincia, e falou da campaña.
Arias lembrou que o bono permaneceu desactivado na época de maior demanda turística –entre o 1 de xullo e mediados de setembro– “porque precisamente un dos obxectivos desta campaña é mellorar as cifras de ocupación fóra da tempada alta”.
Sinalou que os negocios da Zona Sur participantes en 2021 recibiron unha inxección duns 290.000 euros a través desta iniciativa turística, que “volve a ter unha acollida excelente entre a cidadanía na nova edición”.
Tamén salientou que varios concellos desta zona figuran entre os primeiros da provincia de Lugo que rexistraron máis gasto o ano pasado con cargo aos bonos. Así, Pantón foi o terceiro –os usuarios das tarxetas nos locais deste municipio abonaron 157.000 euros–; Monforte de Lemos o sétimo –cun gasto de 52.275 euros–; e Sober o oitavo con 47.798 euros.
Pódense atopar aloxamentos adheridos en Pantón, Monforte de Lemos, Chantada, A Pobra do Brollón, Quiroga, O Saviñao, Folgoso do Courel e Taboada.
OUTONO GASTRONÓMICO
O delegado referiuse tamén a outras iniciativas para fomentar o turismo que ten en marcha a Xunta nestes meses do ano, como o Outono Gastronómico en establecementos de turismo rural, activa desde o 16 de setembro ata o 18 de decembro.
Nove dos locais lucenses participantes están na Zona Sur da provincia, repartidos polos concellos de Taboada, O Courel, O Saviñao, A Pobra do Brollón, Pantón, Quiroga e Sober.
Todas aquelas persoas interesadas en consultar os negocios adheridos ao Bono Turismo ou informarse sobre as opcións dispoñibles nos Outonos Gastronómicos poden facelo a través da páxina web de Turismo de Galicia.
