CCOO, CIG e CSIF pedían conxuntamente a pasada semana, despois do que calificaron como “bochornosa mesa de negociación”, convocar unha Mesa de Negociación onde se vote o documento definitivo que se leve a pleno, cunha negociación real e calendario de reunións para levalas a cabo.
Os sindicatos solicitan a negociación dos criterios de valoración e que se facilite, en tempo e forma, a situación de partida dos postos do Concello tanto económica como de funcións. “CCOO, CIG e CSIF propuxemos todos estes termos para poder sumarnos, pero quedou constatado que a vontade dos representantes do Concello de Monforte non é contar con nós nin cos traballadores de Monforte, polo que nos opoñemos a esta falacia negociadora, por falta dunha negociación real. A representación do Concello pretende que as organizacións sindicais aparezamos como comparsa neste Entroido de Negociación”, sinalan os sindicatos.
CCOO, CIG e CSIF solicitan a supresión da RPT de todos os CPT (complementos persoais transitorios) xa que segundo a lexislación vixente vanse a manter no tempo nas mesmas contías ano tras ano. O Posto recollido RPT Oficial de Mantemento, dependencia Servicios C2 nivel 16 está ocupado desde o ano 2004 como capataz de mantemento e cren que debería estar encadrado como capataz electricista no grupo C1 nivel 18.
En canto ao conservatorio municipal Mestre Ibáñez consideran que o sistema de provisión non é o correcto para os postos de director, xefe de estudos e secretario. Tamén piden aclaracións sobre os postos de traballo da escola de música.
“Falta de documentación e de negociación”, asegura a oposición
Pola súa banda Esperta Monforte presentaba o día 7 dous escritos no concello, un deles queixándose de non poder desenvolver o seu traballo como oposición ao non recibir a documentación a tempo e outro solicitando reunión cos membros da xunta de persoal e co comité de empresa para abordar o RPT.
Este luns, 10 de outubro, era o PP de Monforte o que instaba a Tomé a negociar cos sindicatos a nova Relación de Postos de Traballo do Concello e tamén se queixaban de non ter recibido a suficiente información sobre o tema. “Falta a relación da situación de partida dos postos de traballo, así é imposible saber como afecta ós empregados do Concello esta RPT, porque todas deben contemplar a situación de partida”, sinala Katy Varela. Os populares acusan ao alcalde de “actuar de forma absolutamente opaca e sen negociación cos colectivos da cidade”
