Durante a súa apertura evidenciouse o compromiso por parte de Noa Innova no mesmo, da man da súa socia Rosa Feijoó, e do ofrecemento para unha colaboración activa dos concellos involucrados nesta xornada. Estes municipios estiveron representados polos alcaldes Miguel Angel Soutela (Ribas de Sil) e Jose Luís Rivera (Quiroga).
Asistiron como relatores, representando á Xunta de Galicia, Pomba Vázquez (Xefa da área Provincial de Turismo), Pilar Fernández (Xefa territorial da Consellería de Emprego e Igualdade), M. Olga Iglesias (Xefa Territorial de Medio Rural), Patricia Vázquez (Xefa do Servizo Provincial de Urbanismo), Cristina Franco en representación da Oficinas Conecta de Lugo e Ana Mel (Xefa da área de Cultura) como asistente.
En representación das empresas / emprendementos e actividades da zona participaron nas distintas mesas Guillermo Díaz e Iván Álvarez (Coureleando), Juan Luís Vázquez (Casa de Outeiro e Casa do Estanco), Diego Garcia (Miudiño S.Coop), Manuel López (Asociación de Camiños a Santiago pola Ribeira Sacra), Roi Estévez (Proxecto Vieiros), Nuria Iglesias (Mobyfi), Laura Aldariz (Tecgal Enerxias) e Ramon Vila (Director dos Museos de Quiroga).
Salientar a gran participación e debate entre os asistentes e os relatores das diferentes mesas, nas que se afondou sobre as necesidades reais do Courel: potenciación e maior difusión para fidelizar a marca do Xeoparque e das Montañas do Courel, infraestruturas viarias adecuadas, sinalización e acondicionamento dos roteiros, limpeza dos montes respectando a natureza, xestión focalizada en enxalzar e dar a coñecer o seu patrimonio natural e cultural, profesionalización/fixación dos traballadores, conexión entre os diferentes actores da zona para crear paquetes turísticos atractivos e que inclúan a todos os sectores, transformación dixital para unha conectividade segura e compromiso real das Administracións Públicas para que as axudas e subvencións cheguen aos que realmente as necesitan.
Como conclusión, como ben apuntou o seu moderador Xulio Giz, quedou evidenciado o potente capital humano que está detrás de todos os proxectos onde impera o entusiasmo e as ganas de facer ben as cousas, un desexo desde o corazón de converter ao Courel nun referente da vida rural galega exitosa. Dende a organización comentaban, como reflexión final “esperemos que as Administracións Públicas escoiten as necesidades dos seus habitantes para axuntar esforzos e chegar ao ambicioso obxectivo deste gran proxecto que é fixar poboación e tecido empresarial na zona”.
