A Agrupación de Interese Empresarial Ribeira Sacra Next, proxecto de alianza empresarial que naceu no comezo deste 2023, céntrase no territorio da Ribeira Sacra pero con proxección para dar cobertura a actividades empresariais das provincias de Lugo e de Ourense. Os promotores entenden, neste senso, que conflúen “intereses comúns nun territorio único e que unidos/as poden facer máis forza”.
Os fins desta AIE son: contribuír, desde unha perspectiva empresarial ao desenvolvemento socioeconómico sustentable do Territorio Ribeira Sacra, aproveitando as sinerxias empresariais a través da valorización dos recursos e poñendo no centro ás persoas, o medioambiente, o territorio e a innovación; ser interlocutora con administracións e colectivos de diversa índole; cooperar con outros territorios diferenciados, como é o caso da Ribeira Sacra; e facilitar o acceso aos diferentes Fondos Europeos para que redunden no desenvolvemento do territorio e na mellora da competitividade do tecido produtivo.
DA TEORÍA Á PRÁCTICA
Dende a presentación desta agrupación, e para irlle dando forma e sentido ao proxecto de alianza empresarial que se estaba a crear, foron desenvolvéndose roldas de contactos con administracións e con emprendedores do territorio. Neste mes de novembro, e con máis de 60 empresas que xa forman parte da AIE, desenvolveuse a primeira asemblea na que se definiron as primeiras liñas de actuación constituíndose o Consello de Administración. Este organismo queda formado por 15 persoas que comenzarán a traballar para seguir dando forma a esta realidade ilusionante.
Para descentralizar as reunións e achegarse a todo o territorio interesado, decidiuse tamén que as asembleas foran itinerantes, e despois desta primeira cita en Monforte de Lemos, a vindeira semana reuniranse en Pantón, e antes de rematar o ano será a quenda de Parada de Sil ou Pereiro de Aguiar, na provincia de Ourense.
Outra decisión que saiu desa asemblea foi a decisión de contratar unha xerencia e seguir animando a todas as actividades empresariais da Ribeira Sacra a sumarse a esta iniciativa que busca dinamizar o territorio. “Cremos que é importante participar porque é unha oportunidade. Os problemas e as fortalezas xestiónanse mellor desde a unión. Se gañan as empresas gaña o territorio e gañamos todos”, destacan dous dos promotores, Manuel Dacosta e Severino Rodríguez.
SEGUIMENTO E CONTACTO COA AIE RIBEIRA SACRA NEXT
Para dar a coñecer a agrupación e seguir sumando empresas asociadas creouse unha páxina web a través da cal pódense inscribir as empresas e autónomos/as que o desexen.
Tamén se pode manifestar o interese por sumarse á AIE a través das persoas e os teléfonos seguintes: Severino Rodríguez (609 825 975) Manuel Dacosta (627 514 778)
