Esta semana o alcalde de Monforte, José Tomé Roca, explicou que SOGAMA sube a taxa de recollida de lixo que lle aplica ós concellos neste ano 2025. O rexedor informou de que a finais de 2024, a Xunta de Galicia anunciou esta suba que pasa dos 66 euros ós 108 euros, “o que vai ocasionar un gran impacto nas arcas municipais e en consecuencia tamén nos recibos que pagan os veciños pola recollida e tratamento do lixo”.
O motivo que alega SOGAMA para xustificar esta suba é o imposto estatal regulado na Lei 7 /22, de 8 de abril, de Residuos y suelos contaminados “que provoca uns sobrecustes imposibles de asumir, botando a culpa disto ao goberno de España. Unha lei que na normativa galega vén recollida na Lei 6/2021, de 17 de febreiro, de residuos e chans contaminados de Galicia, polo tanto hai unha lei galega”, apuntou o Alcalde, que lembra que esta lei galega regula un imposto que impón unha Directiva Europea de maio de 2018. Directiva que foi aprobada no Consello de Xefes de Estado e de Goberno ó que asistiu Mariano Rajoy, e na aprobación do Parlamento Europeo, o PP votou a favor.
Segundo explica o alcalde esta directiva grava a incineración e o depósito en vertedoiro por ser as formas medioambientalmente menos recomendables para a xestión de residuos, “Isto obriga a SOGAMA a ter que asumir o imposto pola súa obsoleta xestión e por non ter mudado en todo este tempo, dende o ano 2010, a forma de tratar os residuos. Polo tanto, a Xunta non cumpre as recomendacións europeas no referente á xestión de residuos”. Con todo, o Concello está obrigado a implementar unha taxa, que se calculará distribuíndo as toneladas de residuos xeradas durante o exercicio anterior no Concello, en función do número de beneficiarios do servizo.
Este cálculo permitirá diferenciar entre os importes destinados a cubrir o custo de SOGAMA e aqueles asociados á recollida de residuos e ó punto limpo, “No recibo do lixo, a partir de abril, a xente poderá ver diferenciados o custo de SOGAMA por unha banda, e o custo do Concello por outra”.
O custe de SOGAMA no ano 2024 por recibo foi de 7,08€. O aumento será de 3,03€, polo que o custe total de SOGAMA pasará a ser de 10,11€, “subindo un 42,79% pola mala xestión da Xunta, que agora temos que pagar todos os veciños e veciñas”. O recibo pasará así de 14,65€ en 2024 a 19,05€ cada 2 meses. “A parte do recibo que corresponde ó Concello non sobe nada nesta actualización da ordenanza, asumindo con cargo ó orzamento a mesma cantidade, algo máis de 800.000€”.
O Equipo de Goberno levará ao pleno deste 24 de febreiro a aprobación inicial da Ordenanza Fiscal 2.3 reguladora da taxa pola prestación do servizo de xestión de residuos municipais, que recolle o explicado polo Alcalde nesta rolda de prensa, ordenanza que posteriormente será publicada mediante edicto no Boletín Oficial da Provincia.
Segundo o PP, a suba non é culpa de Sogama senón do “tasazo” do Goberno de Pedro Sánchez
A voceira popular en Monforte, Katy Varela, recorda que o equipo de goberno de Monforte “sabe perfectamente que a suba da taxa do lixo non deriva dunha mala xestión de Sogama”, senón que foi o Goberno do Estado, a través da lei 7/2022, de 8 de abril, de residuos e solos contaminados para unha economía circular, a que impuxo unha suba de impostos ao vertido e á incineración que moitos países europeos non están a aplicar.
“A Xunta opúxose a estes tributos e mesmo presentou alegacións, aínda que sen éxito. O goberno local de Monforte equivócase de culpable. O único responsable é Pedro Sánchez a través do seu tasazo”, explica.
Os populares levan meses con iniciativas para reclamar ao Goberno central que non se aplicase esta suba impositiva e que así Sogama non tivese que repercutila. “A realidade é que Tomé dixo non a reclamar ao Goberno do Estado que dera marcha atrás con este tasazo”. Mentres, segundo os populares, o Goberno do Estado insiste na política de que “quen contamina, paga e recordan que as administracións locais deben asumir integramente o custe real do servizo e activar os mecanismos necesarios para producir menos lixo e reciclar máis”.
Lembran que no 2024, o Concello de Monforte entregou a Sogama 6.446 toneladas de bolsa negra (fracción resto), cantidade pola que a empresa lle facturou 507.478 euros, “E ente local percibiu 81.831 euros a través do FCL adicional activado pola Xunta de Galicia para contrarrestar o impacto económico das medidas aplicadas polo Estado”.
Neste 2025 estímase un desembolso, por parte de Monforte, de 612.370 euro, cifra á que habería que restarlle a contía do FCL (81.831 euros), quedando nun total de 530.539 euros, “Se o ente local incrementa a aportación á reciclaxe, a bolsa negra pesaría menos e o importe da factura a pagar a Sogama sería inferior”. Varela recorda que o Concello de Monforte ten a súa disposición outras alternativas para a reciclaxe diferentes a Sogama. “O problema é que o alcalde sabe que esas alternativas son máis caras que Sogama e, aínda así, prefire seguir en liortas inútiles que en nada axudan aos monfortinos”, concluíu.
