As obras que se desenvolven na rúa Cardenal corresponden a unha intervención de carácter particular destinada a mellorar a potencia da subministración eléctrica nunha vivenda recentemente restaurada. “Entendemos que o desenvolvemento urbano require en ocasións a realización de obras, pero é fundamental que as empresas responsables e os organismos implicados adopten as medidas necesarias para minimizar o seu impacto no comercio local, especialmente nunha das principais arterias comerciais de Monforte de Lemos, onde a densidade de establecementos é elevada”, sinalan desde o CCU.

Aseguran que as obras execútanse nun período clave para a actividade comercial, coincidindo coa campaña de rebaixas e datas sinaladas como o Día de San Valentín, o que xerou un prexuízo considerable para os comerciantes da zona.

“Máis aló da intervención en si, a principal queixa dos afectados radica na aparente lentitude na súa execución. Trasladáronnos que hai días nos que non se observa actividade na obra, que os medios despregados parecen insuficientes e que, en consecuencia, o proceso está a alongarse máis do previsto”, apuntan desde o CCU.

Con todo, o CCU insta aos responsables da obra e á empresa encargada da súa execución para actuar coa máxima celeridade posible e manter unha comunicación fluída cos comerciantes afectados, para reducir na medida do posible os inconvenientes que estas actuacións están a xerar na actividade económica da zona. “Agradecemos a comprensión de todas as partes implicadas e confiamos en que se tomen medidas para evitar que situacións como esta sigan prexudicando ao comercio local, motor económico e social da nosa cidade”, conclúen.