O Concello de Chantada convoca axudas á natalidade para este 2025 que se publicaron no BOP o 19 de marzo e que tamén se poden atopar na sede electrónica do Concello de Chantada.
Así a Administración Local destina 45.000€ para a concesión destas axudas, que teñen como finalidade contribuír a fixar poboación, deseñando mecanismos que favorezan o nacemento e crianza de nenas e nenos como axudar cos gastos ás familias no momento do nacemento, “favorecendo así o asentamento de poboación no noso municipio”, explica o alcalde, Manuel Lorenzo Varela.
A convocatoria 2025 establece dúas liñas de axuda:
- Liña 1: Axudas de primeiro ano de nacemento ou adopción. As axudas serán de 800€ por neno/a nado/a ou adoptado/a no período comprendido entre o 1 de setembro de 2024 e o 31 de decembro de 2025, sempre que non teñan sido xa beneficiarios/as das axudas á natalidade correspondentes ao exercicio 2024.
- Liña 2: Axudas de segundo ano de nacemento ou adopción. As axudas serán de 400€ por neno/a nado/a ou adoptado/a no período comprendido entre o 1 de xaneiro de 2024 e 31 de decembro de 2024, tivesen solicitado ou non a axuda á natalidade do Concello de Chantada correspondente ao exercicio 2024.
Para ser beneficiarios/as das axudas deben cumprirse os seguintes requisitos:
- Os pais, ou polo menos un de eles, deberán estar en situación regular en España e estar empadroados no Concello de Chantada cunha antelación mínima de 1 ano á data de parto ou adopción.
- Os nenos/as nados/as ou adoptados/as deberán estar empadroados no Concello de Chantada.
- Os solicitantes ou solicitante da axuda deberá comprometerse a seguir empadroados no Concello de Chantada, el/ela e os nenos/as, por un período de catro anos dende o nacemento ou adopción.
O prazo de presentación de solicitudes será de 4 meses dende o nacemento ou adopción. As solictitudes presentaranse no rexistro Xeral do Concello de Chantada, aportando a seguinte documentación:
- Libro de Familia e DNI ou NIE do/a solicitante, e tratándose de estranxeiros Documento que acredite a residencia legal en España.
- Certificado de nacemento expedido polo Rexistro Civil ou copia do auto xudicial de adopción, no seu caso.
- Certificación de titularidade do número de conta bancaria no que se recibirá a axuda.
- Declaración xurada de axudas recibidas ou solicitadas para a mesma finalidade. (ANEXO II)
- Compromiso de seguir empadroado no Concello de Chantada por un período mínimo de catro anos (ANEXO I)
- Compromiso de proceder á devolución da axuda no caso de deixar de cumprir algún dos requisitos necesarios para ser beneficiario.
- Declaración xurada de estar o corrente coas obrigas tributarias da AEAT E ATRIGA e da Seguridade Social (ANEXO II)
