Estas axudas están dotadas cun orzamento de 600.000€ do Fondo Europeo Agrícola de Garantía (Feaga). A colleita en verde é a destrución ou eliminación total dos acios de uvas de viñedos que se destinen á produción de uva para vinificación de maneira que se reduza a cero o rendemento da parcela, sen que poidan existir uvas sen vendimar na parcela de viñedo obxecto da axuda.
A parcela de viñedo deberá ter sido plantada previamente ás tres campañas anteriores a aquela na que se solicita a axuda, ter unha superficie igual ou superior a 500 metros cadrados, atoparse en produción e en bo estado vexetativo. A eliminación dos acios debe facerse de maneira manual. As solicitudes presentaranse obrigatoriamente por medios electrónicos ata o 25 de abril. A resolución das parcelas e solicitudes admitidas será antes do 30 de xuño. Dende esta fecha ata o 15 de xullo deberá realizarse a eliminación dos acios A partir desta data a administración realizará controis sobre o terreo a todas as parcelas ás que se concedeu a subvención.
O importe da axuda abarca a suma de dous conceptos:
Primeiro: O importe de eliminación física dos acios que será o 50% do custo, considerado o custo de 1.547,57 €/ha se o realiza o viticultor e 2.499,78 €/ha se se fai mediante contratación externa ou persoal asalariado.
Segundo: O importe da compensación económica do 50 % do produto calculado de multiplicar o rendemento medio da parcela obxecto da axuda considerando para o seu cálculo a media aritmética das tres últimas campañas vitícolas por o valor da uva que é de 1,17 €/kg.
Para informar sobre estas axudas o consello regulador realizará as seguintes charlas
- Día 14 de abril as 19:30 no Auditorio de Chantada
- Día 15 de abril as 19:30 na Casa da Cultura de Sober
- Día 16 de abril as 19:30 no Castelo de Castro Caldelas
Para calquera aclaración ou axuda para presentar a solicitude poden chamar o Consello Regulador Ribeira Sacra o número de 982410968 ou o email info@ribeirasacra.org.
SLG e IGV
Ao respecto da publicación desta orde o Sindicato Labrego Galego-Comisións Labregas dirixiu un escrito á Consellaría do Medio Rural (CMR), solicitando resposta a varias cuestións relacionadas coa solicitude de colleita en verde para a Ribeira Sacra. Consideran que “os prazos son limitados e que os termos nos que se está a desenvolver a súa tramitación non se corresponden cunha vontade real de apoiar ás viticultoras/es”. Lamentan que non se teña dado resposta ás dúbidas que trasladaron fai un mes, “malia contar coa información solicitada”.
Pola súa banda desde IGV consideran que a orde discrimina á agricultura familiar e que está pensada só para os grandes grupos adegueiros. Seguen reclamando axudas directas para as persoas produtoras, tamén en autoconsumo, “sen as cales non existe a paisaxe que se quere converter en Patrimonio da Humanidade: hai que rescatar as persoas que manteñen a superficie amurada de viñedo”.
