A Denominación de Orixe Ribeira Sacra participará en FENAVIN, a Feira Nacional do Viño, que se celebrará do 6 ao 8 de maio de 2025 no Pazo de Feiras IFEDI de Ciudad Real.
Chega a terras manchegas da man da Axencia Galega da Calidade Alimentaria (AGACAL), estará presente no Túnel do Viño de Galicia e presentaranse 24 referencias do territorio protexido, incluíndo 6 viños brancos e 18 tintos elaborados por 10 adegas diferentes.
Ademais desta participación institucional, sete adegas da D.O. Ribeira Sacra contarán con stand propio na feira: Ronsel do Sil S.L., Pazo de La Cuesta SLU, Dominio do Bibei S.L.U., Adega Vella Xeracións S.L., Adega Saíñas C.B., Ponte da Boga, e Rectoral de Amandi.
“A presenza da D.O. Ribeira Sacra neste evento responde ao compromiso do Consello Regulador e das súas adegas por reforzar o seu posicionamento nos mercados nacionais e internacionais, salientando a singularidade dos seus viños e a riqueza vitivinícola do territorio”, comentan dende o Consello Regulador.
FENAVIN
FENAVIN, organizada pola Deputación Provincial de Ciudad Real, está considerada a feira de referencia do viño español. Na edición deste 2025 contará coa participación de máis de 2.000 adegas e cooperativas, e agárdase a asistencia de preto de 15.000 compradores nacionais e 4.000 internacionais.
