O delegado territorial da Xunta en Lugo, José Manuel Balseiro, visitou a empresa de lousa A Campa, en Folgoso do Courel, que recibiu unha achega para a introdución dun sistema de extracción nas cortadoras e a contratación dun servizo de consultoría.
As catro empresas, duas máis en Quiroga e outra en Ribas de Sil, realizaron un investimento total de 667.300 euros. Todas acreditaron investimentos destinados a reducir a exposición ao po dos traballadores nos seus postos de traballo, o que supón unha mellora das condicións laborais. Implementáronse sistemas de extracción forzada e mecanismos para unha maior limpeza no ambiente, como nebulización para atomización de auga no aire.
O grupo mineiro A Campa xestiona unha mina de lousa, con explotación tanto subterránea como a ceo aberto, e dispón dunha nave de transformación en Santa Eufemia do Courel na que adapta as lousas co obxectivo de que sexan utilizadas para teitar. Actualmente conta con 112 traballadores e suma unha produción de 45.000 toneladas ao ano, polo que segue a ser un dos sectores estratéxicos na zona, pola súa importancia económica e capacidade de xerar emprego.
