O constante incremento de viaxeiros nas rutas fluviais da Ribeira Sacra fixo que no 2018 a Deputación reforzase o servizo, ampliando a tempada do 1 de novembro ata o 9 de decembro. A ruta fluvial de Doade foi a que máis aumentou o número de viaxeiros durante este ano, 47.578 persoas viaxaron polo Canón do Sil, fronte aos 41.715 que o fixeron en 2017. Pola súa parte, a Ruta do Cabo do Mundo en Belesar, contou con este ano con 11.430 viaxeiros.
Os viaxeiros do catamarán do Miño coñeceron as aldeas de ribeira, como Belesar, a zona de viñedo, a Praia da Cova ou a Illa de Maiorga, entre outras belezas. E no Sil, os Miradoiros de Pena do Castelo, Chelos, Cadeiras, Soutochao, as Ribeiras do Sil ou as vides de Amandi. Segundo o Deputado de Turismo, Vidal Baamonde “Con estas rutas fluviais dinamizamos a economía local dos 21 Concellos de Lugo e Ourense que integran a Ribeira Sacra, beneficiando, directamente, aos profesionais dos máis de 400 establecementos da zona. É unha aposta polo ecoturismo para xerar riqueza e emprego”.
Segundo o deputado, o servizo de catamaráns mellorouse conscientes da oportunidade económica que supoñen as rutas fluviais, “Melloramos as propias embarcacións, habilitamos unha oficina de atención turística ao público no embarcadoiro de Doade ou unha renovada Central de Reservas, que funciona as 24 horas. Tamén intensificamos as actividades de posta en valor da contorna como, por exemplo, co Festival Internacional de Música 17º, que reuniu a milleiros de persoas en espazos emblemáticos da Ribeira Sacra. Seguiremos a potenciar as rutas fluviais e as actividades na Ribeira Sacra ao abeiro do Plan Estratéxico de Turismo e de cara o seu merecido recoñecemento internacional”.
