Este luns, 27, de outubro, lévase ao pleno do Concello de Monforte a proposta de modificación de ordenanzas fiscais para os orzamentos do ano 2026. O alcalde asegura que, por undécimo ano consecutivo, non haberá subida de taxas e impostos municipais en Monforte.

No exercicio 2026 manterase a redución nun 50% da fiscalidade da ordenanza do Cemiterio por sepultura e transmisións levada a cabo no 2020. Tamén se aplicarán as bonificacións aprobadas no ano 2019 sobre o ICIO, o IAE e o IBI para fomentar a creación de postos de traballo e a implantación de empresas.

No caso dos servizos de abastecemento da auga, rede de sumidoiros e depuración, nos que existen obrigas contractuais con empresas, incrementaranse as tarifas en concordancia ao IPC, establecido entre setembro de 2024 e setembro de 2025, nun 3%.

No que se refire á recollida do lixo, aplicarase unha actualización do 85% do IPC, xa que así o establece o contrato coa concesionaria do servizo, pero este incremento non repercutirá no recibo dos cidadáns, xa que será asumido polo Concello para compensar o impacto provocado pola subida do canon aplicado por Sogama, que si repercute directamente nos cidadáns.

A cota tributaria no recibo do lixo consistirá nunha cantidade variable que se modificará anualmente. No caso das vivendas da zona urbana, o recibo será de 19,05 euros, dos que 10,11 corresponden á variable de Sogama, e 8,94 á do Coste do lixo. Na zona rural o recibo mantense en 9,54 euros, dos que 5,07 son de SOGAMA e 4,48 Coste do Lixo.

“Os monfortinos e as monfortinas pagarán en 2026 o mesmo que veñen tributando nos últimos anos, agás nos recibos da auga e saneamento, nos que, por estar suxeitos a un contrato, incrementaranse nun 3% aplicando a suba do IPC”, detalla o rexedor. “O resto das ordenanzas fiscais que dependen do Concello seguirán conxeladas, como veu ocorrendo desde o ano 2015, data na que chegamos ao Goberno municipal”.

Calendario fiscal

No referente á Ordenanza Fiscal Xeral dos Ingresos Municipais, modifícase o calendario fiscal para adecualo ás datas laborais do vindeiro ano 2026:

• Imposto de Vehículos de Tracción Mecánica: do 10-04-2026 ata o 10-06-2026.
• Imposto de Bens Inmobles: do 05-08-2026 ata o 05-10-2026. Neste caso, os recibos superiores aos 100€ fraccionaranse en dous cargos: o primeiro, polo 60% do importe, farase o 5 de agosto de 2026, e o segundo, polo 40% restante, o 7 de decembro de 2026.
• Imposto sobre Actividades Económicas: do 18-08-2026 ata o 20-10-2026.
• Os recibos dos servizos da auga e a recollida do lixo pasaranse bimestralmente.